“રાહ” – પતિ અને પત્નીના ઝઘડામાં કોનો વાંક છે એ જાણ્યા વગર વાતો કરવી નકામી છે..

0
87

“રાહ”

‘આપણી કંપનીના મેનેજર એમની વાઈફને ડાઈવોર્સ આપી રહ્યા છે.’
‘વ્હોટ? ડાઈવોર્સ? અને તે પણ સર આપે છે? ઈમ્પોસિબલ.’
‘ભાઈ, અહીં બધું જ પોસિબલ છે. જેને આપણે ભગવાન માનીએ તે રાક્ષસ નીકળે અને જેને દોસ્ત માનીએ તે દુશ્મન નીકળે. એટલે કોઈના ઉપર ભરોસો કરવા જેવો નથી.’
‘પણ અચાનક જ શું થયું સરને? સરની વાઈફ તો કેટલી સુંદર છે અને સ્વભાવે પણ સારી જ છે ને? બીજું શું જોઈએ?’

‘ઈશ્યુ પ્રોબ્લેમ છે એવું સાંભળ્યું છે.’
‘એ કંઈ બહુ મોટો ઈશ્યુ ના કહેવાય આજના જમાનામાં. સર તો પાછા કેટલા મોડર્ન વિચારોના છે! કોઈના માનવામાં ન જ આવે આવું તદ્દન વાહિયાત કારણ.’
‘માનવામાં તો ન આવે પણ માનવું પડે એવા કન્ફર્મ્ડ ન્યૂઝ છે.’
‘સાલું, બહુ ખરાબ કહેવાય. આપણને તો પછી સર માટે બિલકુલ માન ના રહે, જો આવું જ કરવાના હોય તો.’
‘સાચ્ચે, મને પણ જાણ્યું ત્યારથી સર પર બહુ ગુસ્સો આવી રહ્યો છે. બિચારાં મૅડમ.’

સમીર અને ચૈતન્ય, લંચ અવરમાં એમના સરની વાઈફની ચિંતા કરી રહ્યા હતા. કોઈને પણ દુ:ખ થાય એવી જ તો વાત હતી. લગ્ન પછી તો, સરે સ્ટાફને કેટલી સરસ પાર્ટી આપી હતી અને બધા સાથે મુલાકાત કરાવતી વખતે પણ મૅડમનાં કેટલાં વખાણ કરતા હતા! મૅડમ પણ સરનાં વખાણની એકેય તક ચૂક્યાં નહોતાં, ત્યારે અચાનક જ આટલાં વરસે ડાઈવોર્સ? વચ્ચે વચ્ચે એવા સમાચાર મળતા રહેતા, કે સરને બાળકની બહુ ઈચ્છા છે અને તેથી જ તેઓ ડૉક્ટરોના અને મંદિરોના ચક્કર લગાવી રહ્યા છે. પણ દુનિયામાં સર જેવા તો કેટલાય લોકો છે, તે આમ ડાઈવોર્સ આપી દે છે? બંને મિત્રોને હવે સર કરતાં પણ મૅડમની ચિંતા કોરી ખાતી હતી. ફક્ત ઈશ્યુ પ્રોબ્લેમને કારણે સર આટલી સમજદાર વાઈફને છોડી દેશે? એની બિચારીની પછી શું ઈજ્જત રહી જશે? એમને ત્યાં તો પાછું નાતજાતવાળું બહુ ખરાબ વાતાવરણ છે, આવું જાણ્યા પછી તો એનાં બીજાં લગ્ન થવા પણ મુશ્કેલ. આવી બદનામી થયા પછી કોણ એનો હાથ પકડશે?

થોડા દિવસ પછી, ફરી સમીર અને ચૈતન્ય લંચ અવરમાં સરની વાત કરતા હતા, પણ આ વખતે?

‘યાર, માનવામાં નથી આવતું. આપણા સર સાથે આવું છેલ્લા ત્રણ વરસથી થઈ રહ્યું છે અને આપણને આજે ખબર પડી? આપણે તો તે દિવસે સરની પાછળ હાથ ધોઈને મંડી જ પડેલા. જાણે કે, આખી દુનિયાનો ઠેકો આપણા જ હાથમાં હોય તેમ, સમાજસુધારાનો ઝંડો લઈને નીકળી પડ્યા બધાને સુધારવા. કોઈની સાચી વાત જાણ્યા વગર કોઈના માટે મનમાં ખોટું વિચારી લેવું આપણા બંને માટે શરમજનક છે. છી!’

‘યાર મને પણ બહુ ખરાબ લાગી રહ્યું છે, આપણે સરને માટે ગમે તેવું વિચારીને મૅડમની દયા ખાવા માંડેલા. કોણ કેવું હોય તે બહારથી કોઈ દિવસ જજ કરવું નહીં, એટલું શીખવા મળ્યું. આપણને શરૂઆતમાં મૅડમ પણ સારા લાગ્યા અને સર તો સારા જ હતા. પછી ઈશ્યુ પ્રોબ્લેમ અને ડાઈવોર્સની વાત સાંભળી, તો તરત જ મૅડમ તરફ ઝૂકી ગયા ને સરને વિલન બનાવી કાઢ્યા. ખરેખર, બહુ જ ખરાબ કહેવાય. મને તો મારી જાત પર શરમ આવે છે. બિચારા સર! જે સ્ત્રી બધાને સુંદર ને સમજદાર લાગેલી, તે જ સ્ત્રી સરના જીવનમાં ઝેર રેડશે એવું તો, કોઈએ વિચાર્યું પણ નહીં હોય, તો સરના તો માનવામાં જ નહીં આવ્યું હોય ને?’

‘આ કિસ્સામાં તો મૅડમનાં માબાપે જ બધું બગાડ્યું છે. જો આવું જ હતું, તો છોકરીને પરણાવી જ શું કામ? ઘરે જ બેસાડવાની હતી ને?’
‘બધું પ્રિ–પ્લાન્ડ જ લાગે છે. સારો ને કમાતો છોકરો શોધીને છોકરીને પરણાવી દીધી અને પછી શરૂ કર્યો ખતરનાક ખેલ. થોડે થોડે દિવસે કાં તો પેલી પિયર જતી રહે અથવા થોડા થોડા દિવસે એનાં પિયરિયાં આવીને ધામો નાંખી દે. શરૂ શરૂમાં સરને બિચારાને બહુ સમજ ના પડી, તે વહેવાર સમજીને બધાંને સગવડો પૂરી પાડ્યે રાખી. એમાં ને એમાં સર પોતાનાં માબાપને રહેવા બોલાવી શકતા નહીં. ત્રણ વરસ પછી પેલી તો પિયર જ જતી રહી અને પિયરિયાંએ સર પર કેસ કરી દીધો! કેસ પણ કેવો? સર રોજ એને મારતા અને ભૂખી રાખતા! લો બોલો! કોઈના માનવામાં આવે? નાની નાની વાતમાં આપણને પાર્ટી આપતા કે ઈવન પ્યૂન અને વૉચમૅનને પણ સાથે ખાવા બેસાડતા સર પોતાની વાઈફને ભૂખી રાખે? અને મારે? નૉનસેન્સ. તદ્દન વાહિયાત કેસ.’

‘હવે સર દર મહિને વકીલ ને કોર્ટનાં ચક્કર કાપે છે. પેલા લોકો મોટો બકરો ફસ્યો સમજીને તગડી રકમ માગે છે. બિચારા સરની તો હાલત થઈ ગઈ છે. નોકરી ને કોર્ટ ને બદનામી ને પૈસાની બરબાદી. કોણ જાણે ક્યારે બિચારાનો છૂટકારો થશે? આપણે સૌ પ્રાર્થના કરીએ કે સરને જલદી આ કેસથી આઝાદી મળે.’
‘મને એમ થાય છે, કે શું સર એક વાર એ લોકો જે માગે છે તે આપીને છૂટા ન થઈ શકે? રોજરોજની આ ઝંઝટ તો નહીં. આ રીતે તો, કેસ પતે ત્યાં સુધીમાં જ સર તો બરબાદ થઈ જશે.’
‘આપણે ભેગા થઈને સરને કંઈ મદદ કરી શકીએ? પૂછી જોઈએ બધાને.’

લંચ અવરમાં ઓફિસમાં સૌને પોતાની જગ્યાએ જ બેઠેલાં જોઈને રાજનને આશ્ચર્ય થયું. એ તરત જ કૅબિનની બહાર નીકળ્યો.
‘કેમ શું થયું? આજે કોઈએ બહાર નથી જવું? એની પ્રોબ્લેમ?’ રાજન ઓફિસમાં તો બને તેટલો સ્વસ્થ જ રહેતો. ઘરના પ્રોબ્લેમ્સને શું દુનિયામાં ઉછાળવાના?
‘સર, અમારે તમને કંઈ કહેવું છે.’ બધા એક સૂરે બોલ્યા. સમીર અને ચૈતન્યે અગાઉથી બધાને સરની હાલત વિશે જણાવેલું, એટલે પોતાના પ્રિય સરને સાથ આપવા બધા એક સાથે તૈયાર થઈ ગયા.
‘હા બોલો.’ રાજન વિચારમાં પડ્યો, બધાને એક જ સરખો પ્રોબ્લેમ? નક્કી પગારવધારાની વાત હોવી જોઈએ. જોઉં તો ખરો, શું કહે છે બધા?
‘સર, તમને કહેતાં બહુ ખરાબ લાગે છે, પણ થોડું પર્સનલ છે.’

‘પર્સનલ? તો બધાંનું પર્સનલ, આમ બધાંની વચ્ચે?’ રાજને થોડા હળવા થવાની કોશિશ કરી.
‘નો સર, તમારી વાત છે.’ અચકાતા અચકાતા ચૈતન્યએ પહેલ કરી.
એક ઘડી રાજનના મોં પર વિષાદની રેખઓ ફરી વળી. ઓહ! તો વાત અહીં પણ પહોંચી ગઈ? એ સ્વસ્થ થઈને, સૉરી કહીને વાત ટાળે તે પહેલાં જ સમીરે કહેવા માંડ્યું,
‘સર, અમને બહુ મોડી ખબર પડી, નહીં તો બહુ પહેલાં જ કોઈ રસ્તો કાઢવામાં, તમને અમે બધા જ મદદ કરત.’
‘હા સર, અમને તો આજે જ ખબર પડી.’ બીજા બધાએ સહાનુભૂતિ દર્શાવતાં કહ્યું.

રાજન ભાંગી પડ્યો. ‘આઈ એમ સૉરી’ કહી એણે આંખ લૂછી.
‘સર પ્લીઝ.’ બધાં રાજનની નજીક ધસી ગયાં. ‘સર, તમે બેસો અને અમારી વાત સાંભળો.’
કેટલાય સમયથી એકલા પડી ગયેલા રાજન સામે તો, જાણે આજે લાગણીનો દરિયો ઘુઘવી રહ્યો. આ બધાં પોતાને આટલો પ્રેમ કરે છે? એણે બધાં સામે આભારનું સ્મિત કર્યું. એ દરમિયાન બધા માટે કૉફી, સૅન્ડવિચ ને સમોસાંનો ઓર્ડર અપાઈ ગયો હતો. આજે આખો સ્ટાફ સરના દુ:ખમાં ભાગીદાર બનવા, એક થઈને સરની પડખે હતો, એ રાજનના સરળ ને સાલસ સ્વભાવનો જ જાદુ હતો.

‘સર, મારા મોટાભાઈ હાઈકોર્ટના વકીલ છે. જેવી મને તમારી વાતની ખબર પડી, કે મેં તરત જ મારા મોટાભાઈને બધું જણાવીને પૂછી લીધું, કે આમાં શું થઈ શકે અને મારા સર કેવી રીતે વહેલી તકે આ પ્રોબ્લેમમાંથી બહાર નીકળી શકે.’
રાજનના મોં પર આભારનું સ્મિત ચમક્યું. ‘છે કોઈ સોલ્યુશન?’
‘છે ને સર, કેમ નહીં? મોટાભાઈએ એક જ સોલ્યુશન બતાવ્યું છે.’
બધાં એક કાને સાંભળી રહ્યાં હતાં. આખરે આપણા સરનો ક્યારે આ મુસીબતથી છૂટકારો થશે?

‘સર, મને કહેતાં ખરાબ લાગે છે પણ ભાઈએ કહેલું, કે પહેલાં સરને પૂછજે કે, હજીય કોઈ ચાન્સ છે કોમ્પ્રોમાઈઝના? શું સરનાં વાઈફ એમના માબાપને છોડીને, ફરી એક વાર સર સાથે રહેવા તૈયાર થાય એમ છે? ઘણી વાર એવું પણ બનતું હોય, કે માબાપ જ પૈસાની લાલચમાં દીકરીનો સંસાર બગાડતાં હોય છે. બાકી, તો દીકરી લાલચુ ના પણ હોય અને અંદરખાને એના પતિ પાસે પાછી ફરવા પણ ઈચ્છતી હોય.’

નિરાશાના સૂરમાં રાજને ડોકું ધુણાવ્યું. ‘મેં તો બહુ કોશિશો કરેલી એને એકાંતમાં બોલાવીને સમજાવવાની, પણ એની અક્કલ પર તો પડદો પડી ગયો છે. એ કંઈ સાંભળવા પણ તૈયાર નથી. મને શું ખબર, કે મારી સાથે તો આ લોકો રમત રમી રહ્યાં છે! એને એના માબાપ સિવાય કોઈ બીજું દેખાતું જ નથી. ઘણાં મોટાં થઈને પણ નાદાન બની રહે છે અને બીજાની અક્કલે જ ચાલે છે. આમ પણ અમે બહુ ઓછો સમય સાથે રહ્યાં છીએ અને અમે એકબીજાને સારી રીતે ઓળખીએ, તે પહેલાં તો આ ખતરનાક ખેલની શરૂઆત થઈ ચૂકેલી.’

ચહલપહલથી રોજ ગાજતી રહેતી ઓફિસ આજે સ્તબ્ધ હતી. સરના ભાવિનો ફેંસલો ચર્ચાતો હતો. શું થશે? સૌના મનમાં એક જ સવાલ સાથે, સર માટે પ્રાર્થના પણ ચાલુ હતી.

‘બસ સર, તો પછી વહેલી તકે ડાઈવોર્સ જ એક રસ્તો છે. હેમાંગભાઈ કહેતા હતા, કે મ્યુચ્યુઅલ અંડરસ્ટેન્ડિંગથી મામલો કોર્ટની બહાર જ પતાવવો સલાહ ભરેલું છે. થોડી ખેંચખાંચ કરીને પણ છૂટકારો મેળવી લો સર. નહીં તો, વરસોનાં વરસો વીતી જશે ને તમે પૈસેટકે પણ પાયમાલ થઈ જશો. સર, ખરાબ નહીં લગાડતા પણ ફાઈનાન્શ્યલી અમે પણ તમને સપોર્ટ કરશું. અમે સમજીએ છીએ સર, તમે આટલાં વરસમાં કેટલા હેરાન થયા હશો ને વકીલે પણ કેટલી તગડી ફી કઢાવી હશે.’

ઘણા સમયથી તોફાનમાં અટવાયેલા રાજનને એક સાથે આટલા બધા હાથોનો સહારો મળતાં એ ગળગળો થઈ ગયો. સમીર અને ચૈતન્યની સાથે બીજા પણ એને ઘેરી વળ્યાં.
‘સર, કૉફી પી લો.’ પછી તો, સૌએ સર સાથે બેસી નાસ્તો કર્યો. વાતાવરણમાં હળવાશ પથરાઈ ગઈ.
‘થૅન્ક યુ ઓલ. મને નહોતી ખબર, કે મારું આટલું લવલી ફૅમિલી હશે.’
‘સર, વી આર ઓલવેઝ વીથ યુ, સર.’
હવે રાજનને બીજા કોઈ સહારાની જરૂર નહોતી.

(સલાહ બદલ શ્રી હેમાંગ કોઠારીનો આભાર.)

લેખક : કલ્પના દેસાઈ

પોસ્ટને શેર કરો તથા લાઇક કરો અમારું પેજ Dealdil.com

તમે આ લેખ “Dealdil.com” ના માધ્યમથી વાંચી રહ્યા છો. આ લખાણની કોપી કરતા પહેલા અમારી લેખિત મંજૂરી લેવી જરૂરી છે. જો તમારી પાસે પણ કોઈ રસપ્રદ વાત છે અથવા કોઈ રસપ્રદ માહિતી છે જે અન્યો સુધી પહોંચવી જોઈએ તેવું તમને લાગે, તો અમને લખી મોકલાવો અમારા Email: blog@dealdil.com પર અથવા Whatsapp: 08000057004 પર. સાથે જ આવી અન્ય સકારાત્મક, રસપ્રદ અને પ્રેરણાત્મક સફર માટે અમારી સાથે જોડાઓ FacebookTwitter અને YouTube પર.

Leave a comment